Lo mes d’abrial vei sortir la version intermediària d’Ubuntu. Entre ajustaments d’interfàcia e nòvas foncionalitats, vos resumissi çò que pòrta.

La version oficiala e bruta d’Ubuntu es equipada de l’environament de burèu GNOME. Es la version publicada lo mes passat qu’es utilizada.

Aviái escrit un article: GNOME 48: benestar numeric e melhoraments (28.03.2025)

Paramètres de benestar numeric, agropament de notificacions, preservacion de la durada de vida de las batariás, fenèstras novèlas centradas per defaut, bóstia de seleccion de la sortida àudio al brancament d’un periferic, clavièr visual redessenhat, editor d’eveniment repensat per l’aplicacion Agenda, Camèra pòt ara numerizar los còdis QR. E encara mai!

L’aplicacion per defaut pels PDF es ara Papers en plaça d’Evince. Papers es una diversion d’Evince portada a la darrièra version dels elements de construccion d’aplicacions de GNOME. Papers cobrís pas encara totas las foncionalitats d’Evince mas per una utilizacion basica, basta: legir de PDF, los anotar, los signar numericament, apondre de marcapaginas, mòde diaporama, far pivotar las paginas, mòde nuèch.

Lo tèma d’icònas Yaru aguèt drech a d’ajustaments.

Lo servici de localizacion en utilizant los rets Wi-fi es ara BeaconDB, lo servici de Mozilla tampèt fa un an. Servís per exemple a obténer lo bon fus orari o la metèo sus d’ordenadors que possedisson pas d’equipament GPS. Permet tanben de juntar amb lo mòde nuèch, en utilizant l’ora de solelh colc.

L’installador d’Ubuntu foguèt modificat per far venir mai simple l’installacion en mòde dualboot. Es a dire, quand volètz installar Ubuntu a costat d’un autre sistèma operatiu, sovent Windows. Una ajuda es presenta a prepaus de BitLocker, lo sistèma de chiframent de Windows.

La traduccion es mai avançada e corrècta qu’en octòbre. S’avètz de remarcas constructivas o que volètz ajudar a manténer la traduccion occitana, contactatz-me.