A còps, a còps, tiò, es possible qu’agi un pauc tròp d’imaginacion. Sabi que tot çò d’uman es imperfèit, e que pòdi aver idèias preconcebudas. Mes ara, vos prengui per testimònis.

I a benlèu un mes, me’n brembi pas tròp plan deu jorn especialament, escotavi France Info. E aquiu, explican qu’avèvan en man un brave escop (scoop) qu’es estat portat a la lutz per la Cellula Investigacion de Radiò França. S’agís de l’escandale de las aigas en botelha, aperada tanben Nestlé Waters, que pertòca l’Elisèu e particularament son secretari generau, Alexis Kohler.

Per hèr brac, Kohler èra assabentat de çò que las aigas de Nestlé en botelha èran contaminadas mes, en contacte sarrat dambe lo lobbista de la firma Nicolas Bouvier, avèva deishat hèr e conservat l’autorizacion.

E doncas France Info ne hè l’informacion màger de la jornada. Jo me’n freti las mans a l’idèia de çò que digore France 2 de ser au jornau televizat. E ben, imaginatz que n’an quitament pas dit un sol mot. Pas un quite. Es pas fantastic, aquò? Ne podètz parlar a l’entorn de vosautes, i a gaireben pas degun qu’ac sap.

Entretemps Kohler a demissionat de l’Elisèu (per pas geinar lo monarca elegit) per trobar un pòste a la banca Société Générale (aquò s’apèra pantoflatge) e a refusat d’encontrar la comission senatoriala qu’enquista aquò dessús, devath l’indignacion de las associacions contra la corrupcion.

Un aute exemple mès recent. Dens la benda de Gaza una ambulància medicala de Creishent Rotge es estada bombardada per l’armada israeliana e totis los 15 aucupants estón tuats. Una enquista èra en cors, mes tot sembla muishar que lo veïcule èra clarament indentificable coma veïcule de secors. Es un crimi de guèrra e la telaranha ne parlava fòrça.

Un còp de mès, èri curiós de saber com lo jornau televizat de France 2 anava tractar lo subjècte.

E un còp de mès, ne parlèn pas, mes per contra am agut l’astre de véser dens aquesta edicion un magnific reportatge sur “las cadièras plegadissas de campatge”.

Non non, saunegi pas. Sabi pas çò que’n pensatz, mes de mon costat, ne soi plan en·hastiat d’aqueste “servici public” qu’amaga informacions de las grèvas. Aquestas duas, las èi ausidas endacòm mès, mes per çò de las autas qu’èi pas ausidas? Ne saberèi pas jamès ren.