E direm pas que "Region sud" fa un pauc "zone sud" de trista memoria.

Malerousamen, saguèrou pa counsulta lous prouvençaus, au contro das abitant d'"Occitanie".
Provo que lous elegi regiounau de Prouvenço fan lus soupo entre eles, qu'un soul tipe ou uno pougnadeto de sa meno decìdou d'après ce que pénsou eles, soulamen eles ("JE ne supportais plus...") e que l'identita de lus regiu se resumis per eles a "sea, sex and sun" ("le soleil, la mer, la montagne, le bien-vivre"). Aquel Muselier em de sa meinajariè sans ime, soun eles prumiè que véndou lou païs. Escoubiha-me tout acò !

Es pire-qu'evident per bien de mounde, en Prouvenço e fuoro Prouvenço, qu'aqueste noum es gairebé lou soul que pegue mièl à l'Istòrio e à la persounalita de la regiu. Amai s'endeven em dau sentimen dau mounde sus plaço : un aspèt de prene en counsideraciu !
Pouirian be, su lou moudèlo de "OCCITANIE - Pyrénées/Méditerranée", ajusta un souto-tite em dau noum Prouvenço. Cò dounariè, simplo prepausiciu : "PROVENCE - Alpes/Méditerranée". Perdequé pa ?
Mè vai sans dire que, d'un poun de visto istourico, lenguistico, culturau e mai encaro noun sai, "PROVENCE" fai ressòn à bien d'aspèt d'aquesto regiu, à sous abitant, as vesi regiounau, à l'enternaciounau amai.
Saguèssou enfi respetado la paraulo dau mounde dau païs e la demoucracìo loucalo, em de prene suèn de counsulta lous ciutadan d'aqui enlai. Aqueles elegi loucau, lus devèn rapela que soun elegi per se faire lous representant de la vous couletivo, noun pa lous dirigent de la regiu : grando diferenço !
Parieiramen au nivèl d'un Esta !

Uno councienço loucalo enracinado pòu e deu mena plan-plan à uno councienço gloubalo "òucitano", "roumanico", "mediteranenco".
Pamen, fai buon ajusta que, din la tèsto dau mounde, amai din l'Istòrio, Òucitanìo esisto pa ou-be es estado uno part aministrativo de touto de la Tèro d'Ò.
Per ieu, la Tèro d'Ò es coumpausado de mai d'un Païs, coumpreses eles-mème din de provinço istourico coumo Prouvenço, Limousi, eca.
Un cop mai hou chau dire, acò pus empourtant es pa lou countenent... mè lou countengu que l'i boutaren.