Pagés edicions ven de publicar en libre era òbra de teatre dera aranesa Manuèla Ané, “Un pòble tara Libertat”: ua istòria ambientada enes ans 40 que rebrembe era solidaritat des vesins de Les, a pròp dera frontèra politica, damb es persones que hugien era persecucion nazi. Damb era  intervencion des hilats d’evasion dera epòca s’artenhèt que molti refugiadi e podèssen rehèr era sua vida.
 
Manuèla Ané qu’a dedicat aguesta òbra a Françoise Sitzer, coneguda en Aran coma Paquita Sitzer, ua des refugiades que passèc per Les quan auie 5 ans. Era e es sòns pairs hugien era persecucion des nazis pr’amor qu’èren judius. Sitzer que tornèc a visitar Les eth 22 d’agost de 2012, venguie de Veneçuèla.
 
 
Es actes de rebrembe ar entor dera visita de Paquita Sitzer, qu’inspirèren a Manuèla Ané, qu’escriuec aquera istòria de ficcion, en sajant d’imaginar se com se hège eth pas d’evadits per aqueres contrades en tot húger  dera barbària nazi installada en vesin estat francéss, damb er objectiu, sustot, d’aumenatjar-los  mès tanben de rebrembar ad aqueres persones,  qu’en tempsi d’incertesa e de pòur, saberen dar un còp de man e ajudèren a sauvar a òmes, hemnes e mainatges perseguidi, sense cap aute tòrt, qu’eth de professar ua auta religion. Bèra ua d’aqueres braves persones èren araneses.