Eth 4 de deseme passat, en Palai dera Generalitat de Catalonha, se hec er acte de clauson der an Robèrt Lafont. Ei atau qu'era Direccion Generau dera Politica Lingüistica deth Departament de Cultura metie eth punt finau a ua seguida d'eveniments e commemoracions as cent ans dera mòrt der escrivan e poeta aranés, Jusèp Condò Sambeat, e des dètz ans dera mòrt de Robèrt Lafont, ua des figures principaus der occitanisme deth sègle XX: pensaire, ensagista, lingüista, sociolingüista, autor teatrau, poèta, romancièr, istorian dera literatura e medievalista, òme d’accion politica, e en definitiva un òme passionat pera lengua e pera cultura occitana.
 
Ath delà des diuerses conferéncies amiades a tèrme per tota Catalonha, s'a hèt ua exposicion sus era nòsta lengua entitolada "Aranés, er occitan de Catalonha", que se poguec visitar en octobre passat en Arts Santa Mònica, e qu'ara se pòt veir en Lhèida enquiath 31 de gèr.