Que i a causas qui semblan hèra bonas dens aquesta video e Florença Faure-Brac que sembla quauqu'un de hòrt simpatic, que pensi que vau essajar lo siròp de paparòc aqueste printemps ...
Mes que i a totun causas chepicantas tanben : dens la video, que parla de subjèctes de santat shens citar estudis scientifics qui aurén validat o invalidat las causas qui prepausa...

E deu men punt de vista n'ac hè pas tanpòc suu son blòg.
Permiei las referéncias qui conseishi, dens la bibliografia deu blòg que i a

- Hlidegarde de Bingen, ua monja de l'Edat Miejana,
- Jean-Marie Pelt, un autor pròche de la societat antroposofica,
- obratges sus la gemoterapia, l'aromaterapia, la medecina chinesa... Hèra de practicas largament reconeishudas com pseudo-scientificas.

En resumit, que pensi qu'ei imprudent de presentar tot aquò com fèits shens los reméter en question atau com si parlàvam deu biais de har ua recèpta de cosina o tistèth de vimi.

Que seré mei aunèste de començar las frasas per ua referéncia : "segon [JM Pelt / Hildegarda de BIngen/ tau o tau libe d'aromaterapia/ tau o tau estudi scientific] aquesta planta que pòt solatjar los còps de sorelh".

De mei si lo fèit de voler suenhà's dab plantas ne pausa pas de problèmas quand avem un petit mau de garganta o las mans sècas l'ivèrn, permiei lo monde qui conselhan aquò e qui'n hèn lo lor mestièr que n'i a tròp sovent qui's substituan aus medecins e/o qui conselhan de non pas véder medecins briga, çò qui pòt estar calificat de derivas sectàrias dens los cas mei grèus.

N'acusi pas briga Florença Faure-Brac de tot aquò... Mes que pensi que quand parlam de "medecinas alternativas", que cau estar plan conscients qu'aquò existeish tanben... e tirà's deu cap l'idea que "s'ei naturau, pòt pas har mau".

Tostemps dens la bibliografia, que cita tanben Dominique Gillet qui, fondator de kokopelli e defensor de tèsis complotistas sus la medecina scientifica (enter autas causas)

Desolat de deishar un comentari tant long e negatiu : qu'aimi la vòsta emission, que l'espii de temps en quant e si tròbi qu'aqueste episòdi ei tecnicament e artisticament hèra plan escadut, que pausa lo problèma de "quin parlar de las medecinas alternativas dens los media?"... E dens aqueste episòdi que'n hètz juste ua promocion shens recul critic.