Estimats Parpalhons, bonjorn o bonser ! Vos dòni la benvenguda dins la pus primièra vidèo ASMR en occitan de l'istòria de la tela. Fa plan temps que d’unes esperavan un ASMR occitan que soi encantat de vos poder porgir a l’ora d’ara. 

Per lo monde que desconeisson l’ASMR, s'agís d’una tecnica de relaxacion que se basa mai que mai suls mormolhs e los bruches agradius. L’objectiu es d’emplonsar las gents dins una bèla sensacion de plenor coma de serenitat. Pòt ajudar per s’endormir o se sentir melhor aprèp una jornada de las duras. L’ASMR es un fenomèn que s’aparenta amb la suggestion, atal coma l'ipnòsi, çò que vòl dire que totòm i es pas receptiu. Ça que la, per los e las qu’o vòlon, prepausi un viatge sensorial a travèrs la lenga d'òc. 

Aquesta vidèo es una vidèo ASMR en occitan qu’es dedicada al repaus. Es recomandat de se l’escotar dins un endrech calme amb un casco o d’escotadors.