La majoritat dels occitans, e maites legeires de Jornalet, benlèu o sabon pas, mas Barcelona Television (BTV) a dempuèi catòrze ans un programa d’antena en occitan. S’agís de l’espaci “Infos Idiomes”, es un programa que se compausa d’una seguida d’informatius brèus en un vintenat de lengas. Las associacions que representan los diferents collectius lingüistics de la vila de Barcelona realizavan de faiçon benevòla lor “info” e lo sostitolavan en catalan. Aital, divèrsas comunautats lingüisticas avián lor votz a la television de la capitala catalana e lo public autoctòn podiá conéisser las inquietuds e los interèsses d’aquelas comunautats. Los “Infos Idiomes” an ganhat los tres prèmis mai importants dins lo mond de l’audiovisual e de la cultura de Catalonha e foguèron presents en l’an 2007 a l’Input, lo salon mondial de la television, ont se presentèron en lenga occitana amb de sostítols en anglés.
 
Es la version occitana que causiguèron per representar lo programa a l’Input, per una rason: del vintenat de lengas, èra la mai seguida pels espectators e es ela qu’aviá l’audiéncia mai fidèla. Tota l’actualitat e los eveniments ligats a la lenga e la cultura occitanas a Barcelona s’emetián sus BTV, e tanben los grands eveniments coma las manfestacions de Carcassona, Besièrs e Tolosa, la polemica senhaletica de Vilanòva de Magalona, l’Estivada de Rodés, la corsa Aran per sa Lengua o lo procès parlamentari que s’acabèt amb l’aprobacion de la Lei de l’occitan, aranés en Aran.
 
Mas la crisi a provocat lo barrament de l’espaci “Infos Idiomes”. Ça que la, lo fach que l’occitan siá lenga oficiala en Catalonha, amb l’accion de qualques institucions coma lo Conselh General d’Aran, an incitat l’estacion de television a remandar la decision dins lo cas concret de l’informatiu occitan. Jornalet se vòl apondre a aquela campanha per evitar que la lenga occitana desaparesca definitivament de la television de la capitala de Catalonha; e esperam que lèu vos poirem donar de bonas nòvas a prepaus de l’afar.