Rodin ven de presentar “Palanca”, lo primièr single de son album venent Pereu. S’agís d’un videoclip que son accion se debana dins un jòc de lenga entre un grop de malhorquins e d’occitans, illustrat perfièchament amb la devisa “lenga ara pertot”. De fach, la lenga es la basa de nòstra identitat. O diguèt Mistral, es la clau que nos desliura de las cadenas que nos ligan a l’alienacion qu’es venguda la nòrma.

Las politicas lingüicidas de l’estat francés an alonhat fòrça generacions d’occitans de lor identitat. Sèm arribats al ponch ont la sindròme d’Estocòlme s’es talament installada dins nòstra cultura qu’una granda partida de nòstre poble la mesprèsa. Fàcia a aquela realitat, Rodin a trobat dins l’illa catalanofòna de Malhòrca lo sosten moral necessari per contunhar de crear en occitan e d’aimar la lenga nòstra, tot un exemple de resiliéncia fàcia a l’indiferéncia.

Ara mai que jamai, cal una accion politica fòrta. La creacion culturala es rica, amb los mèdias e las publicacions que son en creissença mas que, totun, vivon dins la precarietat. Sens un sosten institucional mai fòrt, que permeta un accès universal a l’educacion en occitan, la resisténcia culturala de l’occitan es un miracle.

La politica oficiala, franchimanda o alienada, a capitat a nos far creire que nòstra cultura es pas digna d’atencion, e aquel sentiment a d’èsser inversat. Es sonque per la descobèrta e l’acceptacion de nòstra identitat occitana, que nos es oficialament amagada, que poirem avançar.

Lo 9 de novembre que ven, lo Partit Occitan nos convida a participar a un eveniment que farà un bilanç del movement occitan dins totas sas formas e balharà la paraula als que son en accion a l’ora d’ara, en 2024. La participacion de totes a aquel eveniment es pas solament una escasença de pensar, mas tanben respond al besonh de portar un sosten moral e politic a la nòva generacion occitanista. Cal un sosten politic poderós per contunhar de crear e de viure en occitan, e per ofrir l’accès a nòstra cultura a totes los occitans, dels Alps als Pirenèus e del Massís Central a la Mediterranèa.