Lo ministre de l’Interior francés, Manuel Valls, diguèt fa qualques jorns que i aurà pas cap de departament ni de collectivitat territoriala basca tant qu’ETA existisca. Lo cap de las fòrças de l’òrdre de la Republica Francesa metiá d’aiga al vin dins lo debat territorial e refrejava las perspectivas de fòrça partits e associacions del Bascoat Nòrd, que cresián qu’èra arribada l’ora d’aver un departament pròpri dins l’encastre de la futura reorganizacion territoriala qu’a previst d’aplicar lo president François Hollande. Sens anar mai luènh, la creacion d’un departament basco èra un promessa electorala del quite Partit Socialista de França (PS), e mai la ministra francesa de la Descentralizacion, Marylise Lebranchu, s’i es referida qualques còps.
 
Segon Valls, en de declaracions al jornal espanhòl El País, “tant qu’ETA liure pas las armas, serem inflexibles”. Aital, doncas, las perspectivas democraticas e legitimas dels ciutadans del Bascoat Nòrd demòran plaçadas en dejós de l’activitat d’una banda armada. Es a dire, l’Elisi balha mai de poder e d’influéncia a ETA que non a milièrs e milièrs de ciutadans de la Republica. S’ETA existiguèsse pas, benlèu lo govèrn francés dividiriá lo departament dels Pirenèus Atlantics; mas pr’amor qu’ETA existís, los ciutadans sofrisson e veson la lor demanda refusada. Qual dessenha, doncas, la politica francesa per rapòrt al Bascoat? ETA o ben los ciutadans amb los partits democratics e las associacions del Bascoat?
 
Lo govèrn de França deuriá veire d’otratjar pas los ciutadans franceses. Se se dona mai de legitimitat a una banda armada illegala, se se li dona mai de capacitat d’influéncia politica qu’als partits democratics e legals, qual es lo messatge de Manuel Valls a la populacion? Quala es, vertadièrament, la conviccion democratica d’un sistèma politic que basa la siá accion sus la devisa “Libertat, Egalitat, Fraternitat”?