En aprofechant l’intrada de l’an, la BBC s’es demandat cossí seriá lo futur immediat... e mens immediat. “Tomorrow’s world: a guide to the next 150 years” (Lo Mond de deman, una guida dels 150 ans que venon) es una interessanta infografia ont se representa quaranta prediccions que las an fachas, aquestes darrièrs ans, de blogaires, de scientifics, de jornalistas, de politics e d’expèrts quant a un periòde futur que va d’ongan fins en l’an 2150. Las prediccions, mai o mens ardidas, pertòcan l’informatica e la robotica, la politica e los negòcis, la sciéncia e la natura, la societat e la tecnologia.
 
Qualques exemples: la darrièra prediccion, per 2150, ditz que los èssers umans passaràn los cent cinquanta ans de vida; una autra calcula qu’aperaquí en l’an 2060 i aurà una basa marciana; e a l’entorn de 2050, una bastissa de mai de dètz quilomètres de nautor. Mai près, en 2030, d’unes creson que d’avions comercials sens pilòt volaràn.
 
Pr’amor que los britanics son normalament afogats per escometre, la BBC a demandat a l’entrepresa Ladbrokes qu’emplegue las siás coneissenças per avalorar se cada prediccion vendrà realitat o non.