Lo senat italian a votat que se permeta de jutjar lo cap ultradrechista Matteo Salvini per aver blocat, quand èra ministre de l’Interior, lo desembarcament del naviri umanitari Open Arms. La cambra nauta li a retirat l’immunitat e a autorizat que siá jutjat gràcias als vòtes, demest d’autres, des partits del govèrn: lo Movement Cinc Estelas (M5S), los centristas d’esquèrra del Partit Democrata (PD) e d'Itàlia Viva (IV) e los progressistas de Liures e Egals.
 
Fa un an, aquel senat aviá donat a Salvini mai de poder en matèria de politica migratòria, çò que causèt un chepic a l’Union Europèa. Ara, aquel meteis senat li a levat l’immunitat per que siá jutjat per “sequestracion de personas”.
 
En agost de 2019, lo ministre Salvini bloquèt pendent vint jorns la nau Open Arms, qu’a bòrd i aviá 147 personas salvadas de la mar.
 
L’èx-ministre a reagit sus Twitter en disent que li fasián un “grand present” e qu’el “a la diferéncia dels autres” compareisseriá davant los jutges amb “lo cap naut e l’esquina drecha” tostemps per la “defensa d’Itàlia”.
 
 
Una cachavièlha de 19 jorns
 
Salvini aviá dictat un decret que menaçava d’arrestar e d’impausar de multas d’un milion d’èuros a las organizacions umanitàrias que lors vaissèls intrèsson dins las aigas italianas. En seguida, la còla de l’Open Arms depausèt un recors davant la justícia e, enfin, un tribunal administratiu de la region de Laci suspendèt per precaucion lo decret de Salvini a causa de “la situacion de gravetat e d’urgéncia excepcionala”. Mas Salvini reagiguèt a la decision dels jutges amb colèra e assegurèt que i aviá “un plan” per “recular e dobrir los pòrts italians per qu’Itàlia tornèsse èsser lo camp de refugiats d’Euròpa”. E mai menacèt de tornar signar un decret lèu-lèu perque voliá pas èsser “complice” dels “trafegaires”.
 
Enfin, après 19 jorns de cachavièlha, un procuraire de Sicília verifiquèt la situacion d’extrèma urgéncia de la nau e n’ordenèt lo desembarcament. La nuèch del 20 al 21 d’agost, los migrants poguèron desembarcar sul cai comercial del pòrt de la Lampedosa davant una granda espèra. Lo mond que los esperavan sul pòrt cantèron l’imne antifaissista BellaCiao per los aculhir. Puèi, lo naviri partiguèt vèrs Sicília ont la justícia italiana li a aviá ordenat una confiscacion temporària.

 
 

Mandandomi a processo mi fanno un gran regalo, ma a differenza di altri io ci vado a testa alta e con la schiena dritta.
GRAZIE Amici. Sempre a difesa dell'Italia, sempre!  pic.twitter.com/CFYjGUsVxC

— Matteo Salvini (@matteosalvinimi) July 30, 2020

 

#ULTIMAHORA
Se acabó la inmunidad para #Salvini
Es la hora de la justicia, será juzgado por bloquear el desembarco de las personas rescatadas a bordo del #OpenArms el pasado mes de agosto,cuando era ministro del Interior
El Senado italiano acaba de autorizar que sea juzgado pic.twitter.com/xM5LWYaMK3

— Open Arms (@openarms_fund) July 30, 2020