Lo president de la Republica italiana, Sergio Mattarella, comencèt ièr dimècres una tièra de consultas per encargar la formacion d’un nòu govèrn. Après la demission del primièr ministre, Giuseppe Conte, Mattarella vòl trobar abans divendres quin candidat auriá pro de sosten parlamentari per dirigir lo nòu executiu. Mattarella parlèt ièr amb los presidents de la Cambra dels Deputats e del Senat, e uèi e deman parlarà amb los grops parlamentaris.
 
De son costat, Conte a repres sos contactes per començar de trabalhar en un “Govèrn per la salvacion nacionala”, presidit per el meteis e amb de membres qu’”ajan dins lo còr lo destin de la Republica”, çò anoncièt dimars suls rets socialas, après presentar sa demission per manca de sosten parlamentari. En responsa a la crida de Conte, s’es bastit al Senat un grop de dètz senators sonats “Europeïstas”, qu’inclutz d’èx-membres del Movement 5 Estelas e del grop mixte e que seriá lèst per sosténer un eventual tresen govèrn de conte.
 
Pasmens, aquel sosten bastar pas per assegurar l’espelida d’un nòu govèrn. Es per que los agaches son ara sus la formacion Itàlia Viva, de Matteo Renzi, que forcèt la setmana passada aquesta crisi de govèrn en retirar sas doas ministras de l’executiu de Conte per protestar contra la gestion dels fonzes de recuperacion economica de l’UE.
 
De lor caire, los partits de la drecha Anem Itàlia, Fraires d’Itàlia e la Liga anoncièron que se presentarián amassa a las convèrsas amb Mattarella per exprimir una posicion unica. Lo cap d’Anem Itàlia, Silvio Berlusconi, s’es mostrat disponible per constituir un govèrn que represente “l’unitat substanciala del país a un moment d’emergéncia”, mas sos sòcis de coalicion preferisson que se convòque d’eleccions anticipadas, car los sondatges lor son favorables.
 
La decision de Mattarella se poiriá anonciar dissabte de matin.