Lo tribunal judiciari de Tolosa a condemnat la consolessa màger de Montalban, Brigitte Barèges, a cinc ans d’inelegibilitat, 12 meses de preson amb sosta e 15 000 èuros de multa per un afar de desviament de fonzes publics. Lo jutjament s’es fach en l'abséncia de Barèges. Pendent tot lo procès ela a refusat las acusacions. Pasmens, tanlèu que lo prefècte li aurà notificat la senténcia, deurà quitar totas sas cargas publicas, coma consolessa màger e coma presidenta de la comunautat d’aglomeracion del Grand Montalban.
 
En 2015, la consolessa e anciana deputada foguèt mesa en examen per “desviament de fonzes publics per persona depositària de l’autoritat publica o investida d’una mission de servici public”. L’enquista se dobriguèt après qu’un emplegat de la municipalitat foguèt estat pagat per la collectivitat per escriure dins de jornals locals d’articles favorables a Brigitte Barèges e desfavorables a l’oposicion. 
 
Barèges, del partit Los Republicans, emportèt la comuna de la capitala carcinòla en 2001, alavetz amb l’UMP, après 36 ans de govèrn socialista. I arribèt après una campanha consagrada a la lucha contra la corrupcion e l’inseguretat. Es coneguda per sos prepauses omofòbs e xenofòbs.