L’independentisme s’es tornarmai impausat a las eleccions d’Escòcia. Lo resultat obtengut legitima la demanda d’un segond referendum d’independéncia que, a l’ora d’ara, lo govèrn britanic de Boris Jonhson refusa. Lo Partit Nacional Escocés (SNP) a obtengut 64 deputats e los Verds 8, en tot despassar, largament, la majoritat absoluda del parlament d’Holyrood, fixada a 65 sètis. Nicola Sturgeon serà reelegida primièra ministra e afrontarà una legislatura marcada per la gestion de la pandemia e sa crisi resultanta e la revendicacion del referendum.
 
Quant a Alba, lo partit creat per l’èx-primièr ministre Alex Salmond, a pas obtengut cap de deputat. L’SNP a un deputat de mai qu’en 2016, lo Partit Conservator sèrva sos 31 sètis, lo Partit Trabalhista n’a perdut dos e davala a 22, los Verds aumentan lor preséncia de dos deputats e los Liberals Democratas ne pèrdon un amb 4 representants.
 
Tot comptat e rebatut, l’independentisme escocés creis de tres deputats al parlament a respècte de 2016, en passant de 69 representants a 72. La participacion a aquelas eleccions es estada del 63% dels inscriches, çò es d'un 7% pus nauta qu’a las eleccions precedentas.
 
 
Creissença de l’independentisme a Galas
 
Quant a Galas, lo Partit Trabalhista a ganhat las eleccions amb clartat en tot obténer 30 deputats, a un sèti de la majoritat absoluda. Lo Partit Conservator es estada la segonda fòrça amb 16 deputats, e los Liberals Democratas solament n’an obtengut 1. La drecha populista eurofòba de l’UKIP a desaparegut de l’assemblada legislativa de Galas.
 
Los independentistas del Plaid Cymru an ara 13 representants, un de mai qu’a las eleccions precedentas. Son la tresena fòrça del Senedd, lo parlament galés.