“La principala leiçon dels movements independentistas de Catalonha e Escòcia es que son estats relativament eficaces sens quitar d’èsser pacifics, en contrast amb los separatismes violents de l’IRA en Irlanda del Nòrd o d’ÈTA al Bascoat”. Vaquí l’analisi que fa l’agéncia internacionala Reuters, que consagra un reportatge a comparar los procèsses independentistas d’Escòcia e Catalonha. Se demanda se los referendums dins los dos païses, previstes per l’an 2014, poirián cambiar Euròpa, e descriu un interès creissent en defòra del continent, mai que mai als Estats Units, en Russia e en China, se per cas i a de cambiaments radicals dins dos dels grands estats del vièlh continent.
 
Lo reportatge de Reuters rapòrta que, d’un costat, en Catalonha, lo sosten a l’independéncia es de mai de 50%, mas de l’autre, en Escòcia, despassa pas lo tèrç dels votants. Ça que la preditz que la situacion pòt cambiar quand arribaràn las eleccions. Lo jornalista explica que cap de las personas qu’entrevistèt per las carrièras de Barcelona, quand fasiá lo reportatge, se mostrèt pas “estrambordada amb l’idèa de manténer un estat jonch a Espanha”. “Los que vòlon votar contra l’independéncia parlan de malfisança envèrs los politicians en general, e dobtan que los caps d’una Catalonha independenta o pòscan far gaire melhor”, çò soslinha l’article.
 
Lo tèxt cita d’analistas e d’expèrts internacionals que dison que los procèsses començats en Catalonha e Escòcia “revelhan l’interès delà Euròpa”, mai que mai en China, en Russia e als Estats Units. Reuters a entrevistat Fiona Hill, èx-membre del Conselh d’Intelligéncia Nacionala dels Estats Units e ara responsabla dels afars europèus de la Brookings Institution de Washington. Segon ela, sembla que Londres e Madrid s’avisan pas de l’importància de tot çò que se passa. “Parlam de dos dels estats mai ancians d’Euròpa”, çò remarca Hill dins aquel reportatge.
 
Segon Reuters, se Catalonha e Escòcia vòtan en favor de l’independéncia, “degun sap pas çò que significarà dins la practica”: als dos nòus estats lor caldriá negociar probable l’intrada dins l’Union Europèa e i pòt aver un vèto de la part de Londres o de Madrid. Pasmens, Reuters soslinha las diferéncias entre l’actitud del primièr ministre britanic, David Cameron, “qu’a acceptat de cooperar amb lo referendum”, e la del govèrn espanhòl, que, “en contrast, a declarat que lucharà contra la consulta per de rasons constitucionalas”.