Lo Parlament Europèu reclama l’eliminacion dels brevets suls vaccins contra la covid-19 per que se pòscan produire e distribuir pertot. Una resolucion aprovada dimècres passat per l’eurocambra demanda a l’Organizacion Mondiala del Comèrci (OMC) que los elimine. “Las circonstàncias excepcionalas requerisson de solucions excepcionalas”, çò ditz lo tèxt aprovat amb 355 vòtes en favor, 263 contra e 71 abstencions. A mai, gràcias a un emendament prepausat pels Verds, la resolucion tanben demanda de priorizar “la distribucion gegografica mondiala” per la produccion dels vaccins.
 
Segon los expèrts, amb la supression dels brevets suls vaccins, la produccion aumentariá de 12 a 60 milions de dòsis per jorn, en consequéncia de qué d’aicí a 8 meses se poiriá immunizar tota la planeta. De mai en mai de mètges reclaman que la situacion siá jol contraròtle dels govèrns e non pas de societats privadas de la tòca lucrativa.
 
D’organizacions umanitàrias an saludat la resolucion. Dins aquel sens, Oxfam Intermón remembra que lo sistèma actual dels vaccins a generat “9 miliardaris nòus” del temps que los païses paures deuràn esperar “57 ans per que se vaccine tota la populacion”.
 
 
Oposicion de la Comission Europèa
 
Ça que la, la Comission Europèa s’opausa a la supression totala dels brevets, que si que revendican de païses coma Índia e los Estats Units, e prepausa solament que los govèrns pòscan obligar a las societats farmaceuticas de cedir los brevets a un prètz “accessible”.