Lo filme Bogre, realizat pel cineasta occitan conegut Fredo Valla, se projectarà dins los jorns avenidors a Besièrs, Barcelona e Lhèida en preséncia del realizaire. Presentat en primièra al Festenal Internacional de Cinèma de Sòfia dins la prima passada, s’agís d’un documentari de 200 minutas que tracta una crusèla persecucion religiosa de las consequéncias umanitàrias desastrosas. A mai, s’i revèla d'istòrias tombadas dins la desmembrança, l’anar e venir de personas, de culturas e d’idèas que bastiguèron en Occitània una civilizacion revolucionària que l’intolerància poguèt pas suportar.
   
 
Un filme en cinc lengas, dont l’occitan
 
Bogre es un filme en cinc lengas (bulgar, francés, occitan, italian e bosnian) que se distributz amb de sostítols en quina que siá d’aquelas cinc lengas. Es produch per la Chambra d’Òc amb lo sosten del CIRDÒC, demest d’autres. Per las projeccions en Catalonha, s’es ajustat de sostítols en catalan.
 
 
Un insult per justificar un genocidi
 
En occitan, lo mot “bogre” significava originàriament “abitant de Bulgaria”. Puèi —çò ditz lo filme— venguèt un insulte adreiçat als catars d’Occitània. En occitan actual, “bogre” a pres un significat d’inapte, de coquin, de persona malfasenta qu’amaga la vertat. Aquel cambiament semantic se compren plan quand coneissèm las rasons per las qualas se decidiguèt de perseguir los catars. Fòrça d’elas an de coïncidéncias esfraiosas amb los arguments qu’an justificat la shoah e tantes autres genocidis. A mai, los occitans suspèctes d’èsser catars o d’aver aculhit un catar èran marcats amb una crotz jauna cosuda sul pitre.