capçalera campanha

Actualitats

InternacionalPolitica

Israèl: fòrta tension après que lo Parlament a limitat lo poder dels jutges

Fàcia a la decision de nacionalistas e ultraortodòxes, los democratas e liberals crenhon l’instauracion una d’autocracia e quitament una teocracia

| Abir Sultan

Tèxte legit

Lo parlament d’Israèl aprovèt diluns una mesura per limitar la capacitat de la Cort Suprèma per abolir las accions del govèrn, una iniciativa desirada per l’extrèma drecha. La decision foguèt presa malgrat las protèstas massissas que se tenon dempuèi qualques meses, al despièch de la condemnacion internacionala e de cridas a la moderacion dels caps entrepresarials e militars per cercar un consens dins una societat prigondament devesida.

Lo primièr ministre, Benjamin Netanyahu, que ven de sortir de l’espital après una intervencion del còr, demorèt silenciós pendent lo vòte parlamentari, malgrat los crits de mesprètz que recebèt. La coalicion del cap del govèrn, formada de partits de drecha, conservators religioses e ultranacionalistas, mantenguèt una postura ferma e obtenguèt l’aprobacion de la mesura amb un vòte de 64 a 0, après que los membres de l’oposicion aguèron quitada la cambra en protèsta.

Aquel cambiament legislatiu representa una victòria iniciala pel govèrn, pr’amor qu’afeblís lo poder judiciari d’Israèl e li lèva una part de la capacitat de revisar las decisions del govèrn. La lucha per contrarotlar lo poder judiciari a creada una prigonda division dins lo país dempuèi que lo nòu govèrn de Netanyahu assumiguèt lo poder a la fin de decembre. La mesura l’a egalament criticada lo president dels Estats Units, Joe Biden.

L’esfòrç per afeblir lo poder judicial es estat impulsat per de partits d’extrèma drecha e ultraortodòxes que vòlon impausar lo conservatisme religiós dins los espacis publics e las politicas governamentalas. D’autre caire, los liberals, concentrats dins los centres tecnologics e culturals del país, veson aquela mesura coma una avançada cap a una autocracia e quitament una teocracia, ont los caps religioses poirián dictar lor volontat a la populacion.

Las consequéncias d’aquela decision son estadas immediatas, amb de manifestacions massissas per carrièras, d’avertiments de boicòt dels reservistas militars e de paurs per l’avenir economic del país, amb la fugida de fonzes e investiments. La situacion en Israèl contunha d’èsser tibada e lo malcontentament popular aumenta davant aquel movement per limitar lo poder de la Cort Suprèma.

 

 

 

 

 

 

 

 

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris


I a pas cap de comentari

Escriu un comentari sus aqueste article