Niça se prepara per commemorar lo centenari del monument dedicat a Catarina Segurana, una figura emblematica de l’istòria niçarda. L’eveniment se tendrà lo dissabte que ven 25 de novembre a 11 oras sus la Plaça Sant Agustin, davant lo monument situat dins la vièlha vila de Niça, çò rapòrta France 3.

Lo monument, inaugurat lo 25 de novembre de 1923, foguèt erigit gràcias a l’iniciativa del Comitat de las Tradicions Niçardas, dirigit per Menica Rondelly, l’autor del famós imne Niça la Bèla. Aquela realizacion significativa foguèt possibla gràcias a una soscripcion publica e l’aprobacion del cònsol màger de Niça d’aquel temps, Pèire Gautier.

Per onorar la memòria de Catarina Segurana, l’organizacion dicha La República de Niça farà una ceremònia esmoventa que comprendrà un depaus de flors davant lo monument. Las autoritats localas, los representants de la comunautat e lo public son convidats a jónher aquel eveniment commemoratiu, soslinhant aital l’importància istorica de Catarina Segurana e de son eiretatge dins la cultura niçarda. D’associacions coma La Remembrança Niçarda, Niça Pantais, Lo Cairèu Niçard, la Ciamada Niçarda, Niça La Polida, l’Acadèmia Niçarda e d’autras participan a aquela commemoracion.

Catarina Segurana, coneguda per son coratge e son abnegacion de cap a sa vila, demòra una font d’inspiracion per las generacions actualas e futuras. La celebracion del centenari del monument es una escasença especiala de rendre omenatge a aquela figura emblematica e d’afortir lo ligam entre los abitants de Niça e lor ric patrimòni istoric e cultural.

L’istòria —o la legenda— de Catarina Segurana remonta a l’an 1543, quand Niça foguèt assetjada per las tropas francesas de Francés Ir e las fòrças otomanas de Soliman Ir. Armada de son bacèl de bugadièra, combatiá sul bastion dels Cinc Caires, representant aital totes los civils, en particular las femnas, que luchèron per defendre la vila.