Lo 21 de setembre passat, la localitat de Sant Cristòu, situada dins la comuna de Sant Cristòu e Verargas (en francés e oficialament dempuèi 2019, “Entre-Vignes”, dins la Costièra de Nimes), inaugurèt los primièrs panèls de carrièra en occitan, çò rapòrta Midi Libre. Aquel eveniment, fruch del trabalh de l’associacion Los Amics de la Baragònha, marca un pas important dins la promocion del patrimòni cultural occitan. La ceremònia contunhèt dins l’airal de la gara amb l’inauguracion del Potz de la Baragònha, classat coma patrimòni cultural immaterial de la comuna.

En 2016, un estudi sus las traças de la cultura occitana dins los toponims e los noms de carrièras foguèt lançat jos la direccion de Josiana Ubaud, l’etnobotanista e lexicografa, amb la participacion dels estudiants dels corses d’occitan menats per Jean Simar. Aquel projècte a per tòca de sensibilizar la populacion de l’importància de la cultura occitana e d’afortir lo ligam intergeneracional.

Los Amics de la Baragònha, una associacion consagrada a la preservacion e la promocion de la lenga, de las tradicions e de la cultura occitanas, pòrta lo nom de la Baragònha, un animal totemic amb una fòrta tradicion locala.