A Nimes, i aurà 3 jorns de Rescòntres Jòrgi Gròs lei 8, 9 e 10 de novembre 2024. A l’iniciativa de l’associacion MASC que son president es Pascal Marconato, grand amic de Jòrgi, amb l’ajuda dau Comitat de Quartier de la Placeta, dau Pichòt Teatre de la Placeta, dau Fogau Albaric e de l’Ostau de la Region, aquelei tres jornadas rendràn un omenatge bèu a Jòrgi Gròs que fuguèt regent de l’escòla Freinet, escrivan e contaire ben conegut en Gard e dins tot lo mitan occitanista.

A l’escasença dei jornadas, sortirà lo novèu libre Lei camins de Michèu l’Hardit, 8 contes de J.Gròs presentats per Lisa Gròs, sa filha, e Daniel Ollive, que prepara una tèsi sus l’òbra de l’escrivan occitan e occitanista.

Escaissat “lo Contaire de la Placeta”, Jòrgi Gròs fuguèt un escrivan e contaire occitan dau país de Nimes. Ensenhaire e pedagòg membre de l'escòla Freinet, fuguèt un dei motors de l'occitanisme dins lo ròdol gardonenc. Una dei doas calandretas de Nimes pòrta son nom.  Nos quitèt lo 16 de febrier de 2018 a l’edat de 95 ans.

Vaicí lo programa ric çai jonch; siatz convidats a vos jónher a la fèsta.