Lo ministre espanhòl de l’interior, Jorge Fernández Díaz, a concedit la medalha d’aur del meriti policièr, de faiçon onorifica, a Nòstra Dòna Maria Santissima de l’Amor, segon l’òrdre ministerial qu’el signèt lo 3 de febrièr passat. Lo ministre a justificat lo fach d’autrejar la decoracion a una verge perque sos confraires collabòran “estrechament” amb la polícia “dins los actes que se celèbran pendent la Setmana Santa”. Lo ministre tanben vòl reconéisser las valors de “dedicacion, pena, solidaritat e sacrifici” de la còla religiosa.
 
Es pas lo primièr còp que la devocion religiosa pren sa plaça dins lo govèrn espanhòl del Partit Popular. En setembre de 2012, lo govèrn espanhòl autregèt la granda crotz de la gàrdia civila a Nòstra Dòna del Pilar. De mai, l’evesque emerit José Sánchez, de Sigüenza e Guadalajara, recebèt la medalha d’onor de l’emigracion e en setembre lo ministre donèt a l’òrdre religiós de la Mercé la medalha d’aur del meriti “per lor òbra pastorala dins las presons espanhòlas”.