Lo secretari generau de l’OTAN a declarat que Russia organiza de las campanhas de desinformacion sus la fracturacion idraulica per garentir los aprovesiments europèus en gas rus.

Los opausants occitans au gas de sistre seràn segurament fòrça susprés d’o aprene mas, segon Anders Fogh Rasmussen, ancian primier ministre danés e secretari generau de l’OTAN, Russia los ajudariá secretament. “Rescontrèi d’aliats que pòdon raportar que Russia, dins l’encastre de sas operacions sofisticadas d’informacion e de desinformacion, es activament engatjada emb las organizacions dichas non-governamentalas —organizacions ecologistas que trabalhan contra lo gas de sistre— per manténer la dependéncia europèa au gas rus importat”, çò declaret, segon çò que rapòrta The Guardian. Rasmussen precisèt pas quala forma pren quel engatjament nimai se los ecologistas sabián que trabalhavan emb daus agents de Moscòu. “Qu’es mon interpretacion”, çò diguèt.
 
Las associacions ecologistas an lèu-lèu atacat quelas declaracions, especialament sus los malhums sociaus. “L’idèa que siam de las marionetas de Putin es tant absurda qu’avèm de nos demandar çò que fuman au sèti de l’OTAN”, çò diguèt Greenpeace, que veguèt 30 de sos militants achabar dins las presons russas après una accion dins l’Artic. Lo servici de premsa de l’organizacion transatlantica precisèt que las remarcas èran daus ponchs de visda personaus de Rasmussen e pas de las posicions oficialas.
 
Rasmussen apondèt que la seguretat energetica èra de la mai bèla importància e qu’es necessari per las nacions europèas de diversificar lors fonts d’aprovesiment. Se, per se, la fracturacion idraulica poiriá garentir l’avenidor energetic d’Euròpa, quò es pas la chausida de tots los estats. França interdiguèt quela tecnica a la visda daus problèmas ecologics que coneis l’America dau Nòrd. Per lo govèrn polonés, favorable a la fracturacion idraulica, l’obstacle primier demòra la geologia. Polonha, emb sas resèrvas bèlas en gas de sistre, serà benlèu dins l’incapacitat d’i accedir.
 
 
 
 
Maime Caillon