Lo relòtge jòga ja contra lo temps en las negociacions del nòu paquet d’ajudas a Grècia. Dimenge de ser los negociaires grècs e los de la tròica clavèron, sens cap d’acòrdi, la sèria de negociacions que s’èran dobèrtas la dimenjada. Ara lo temps cor contra lo govèrn grèc. Dijòus tornaràn negociar mas amb lo temps ja tròp just per un acòrdi que deuriá evitar la quincanèla prevista pel 30 de junh.

Lo 30 de junh s’acaba l’actual plan de salvament de Grècia e l’estat grèc deu pagar 1,5 miliard d’èuros a l’FMI. Se i a pas cap d’acòrdi abans, l’Union Europèa daissarà de pagar l’argent promés a Grècia, en dobrissent una situacion de quincanèla tecnica de l’estat. Lo problèma principal es que lo nòu paquet d’ajudas cal que siá aprovat pels parlaments, e non los govèrns, de divèrses estats europèus, compresa Alemanha, e aquò d’aquí, ara que rèstan nonmàs doas setmanas, bota lo calendièr al limit.

En las negociacions d’aquesta dimenjada las doas còlas de negociairas arribèron pas a cap d’acòrdi per reduire los 2 miliards d’èuros que la tròica considèra que los cal ajustar encara. Lo govèrn grèc diguèt qu’acceptariá pas, de cap de manièra, de nòvas pojadas d’impòstes ni de retalhadas.