La justícia francesa a arrestat la difusion del filme La vie d’Adèle (La vida d’Adèla), ganhant de la Palma d’Aur al Festenal de Canas (Vencenc) en 2013, en seguida de la denóncia facha per l’associacion ultracatolica Promouvoir, segon çò que rapòrta France TV Info. La cort administrativa d’apelacion de París a anullat lo visat d’esplecha e a donat dos meses a la ministra de la cultura francesa, Fleur Pellerin. La cort estima que La vie d’Adèle compòrta “plusors scènas de sèxe presentadas de faiçon realista, en gròs plan”, que son “de natura a ferir la sensibilitat del public jove”.
 
Ara lo filme es blocat sus totes los supòrts de difusion a la television, en vidèo a la demanda, en DVD... La quita projeccion dins ua sala de cinèma, dins lo quadre d’un festenal o d’una retrospectiva, es tanplan enebida.
 
Lo Ministèri de la Cultura francés a anonciat son intencion d’introduire un recors davant lo Conselh d’Estat. Pasmens, France TV remarca que l’associacion extremista catolica qu’a fach sa denóncia en justícia a enregistrat d’autras victòrias davant lo Conselh d’Estat, coma per exemple l’enebicion als menors de mens de 18 ans del filme Baise-moi de Virginie Despentes, en 2000. L’associacion Promouvoir s’apièja sus un article del Còde del Cinèma e de l’Imatge Animat qu’estipula que tot filme que “compòrta de scènas de sèxe non simuladas o de plans granda violéncia” deu èsser enebit als menors de mens de 18 ans. Es una definicion pro larga que daissa una plaça granda a l’interpretacion dels jutges.
 
Lo filme del director occitan e tunisian Abd Al Atif Kashish (o Abdellatif Kechiche segon la transcripcion francesa) conten de longas scènas de sèxe explicit entre Léa Seydoux e Adèle Exarchopoulos, e a descadenat de protèstas furiosas e violentas de la glèisa catolica e de l’ultradrecha.