Lo primièr ministre francés Manuel Valls mençonèt l’independentisme catalan coma un “desfís màger” que l’Union Europèa lo deu afrontar. Dins un discors fach a la premsa a París, Valls mençonèt “los risques de separatisme —òm pensa a Catalonha o a Escòcia—” amb “la menaça del terrorisme, la crisi dels refugiats —e pas solament en Alemanha—” e  “las tensions entre los païses del nòrd e l’èst d’Euròpa amb los del sud”. Segon Valls, “probable Euròpa es confrontada a son rendètz-vos pus important dempuèi la darrièra guèrra mondiala” e “la paraula de França serà tot plen esenciala”.
 
Valls remembrèt que l’UE es un “projècte prigondament democratic” basat sus la “reconciliacion” entre França e Alemanha e qu’a permés l’incorporacion “dels païses del sud, que sortissián de la dictatura” e dels païses de l’èst, que “sortissián del jo stalinista”. Lo primièr ministre francés soslinhèt que l’Union Europèa a permés de “crear un espaci economic, una moneda unica e la liura circulacion dels bens e sustot, de las personas”.
 
Valls disiá que “la paraula de França ser[iá] essenciala” per agir davant los desfises d’Euròpa, e que respondriá “amb constància” e en pensant al futur de la Republica. Valls prononcièt aquel discors après la demission, dimècres, de la ministra de la justícia francesa, Christiane Taubira, a causa de sos desacòrdis sus la desescasença de nacionalitat. Taubira s’opausa a la modificacion de la Constitucion defenduda per Manuel Valls, que cèrca de privar de la nacionalitat francesa las personas liadas amb lo jihadisme.
 
 

 
 
 
 
 

---