Diluns 15 de febrièr, lo Papa Francés demandèt perdon als pòbles originaris de Mexic “per l’exclusion qu’aguèron de suportar” e autorizèt la glèisa a far servir lors lengas dins la liturgia. Ne parlèt durant una messa a San Cristóbal de las Casas, un bastion de la guerrilha zapatista, dins l’estat del sud de Chiapas, lo mai paure e lo qu’a lo mai grand nombre d’indigènas de Mexic. La celebracion religiosa se faguèt en espanhòl, tzeltal, tzotzil e chol. Lo Papa prononcièt quitament qualques frasas en aquelas lengas.

Dins l’omelia, davant aperaquí cent mila personas, provenent de las principalas nacions de l’estat —tzotzil, tzeltal, chol e tojolabal—, mas tanben de Guatemala e d’autres païses de l’America Centrala, Francés diguèt que los pòbles indigènas èran estats incompreses e excluses de la societat e qu’òm aviá temptat de lor “anestesiar l’arma”.

Lo Papa condemnèt tanben lo fach que los indigènas foguèron despolhats de lors tèrras per de personas “corrompudas per lo poder, los sòus e las leis del mercat”.
 



Messa en lenga tzotzil

---