Aran In Edit nèish deth reportatge ampliat Aran Ath Limit, qu’er an passat aumplic eth cinèma de Vielha en tot deishar damb era boca dubèrta de plaser a toti es presents. Ara, Torremocha bastís ua ora de nhèu en pantalha a partir de mès de 75 ores d'enregistrament ath long de tot er iuèrn. Mès, calerà demorar enquia noveme entà vèir eth resultat finau, donques encara manquen longues ores d’edicion.

Era produccion atrauessarà es montanhes dera Val enquia hestivaus internacionaus coma es de Torelló, Sent Lari e Vitòria. Ei clau “promòir era Val d’Aran e potenciar eth freeride en Euròpa e, sustot, Espanha” remèrque Torremocha. Eth joen director sajarà tanben de portar-lo en mòstres documentaus des Estats Units e competir damb es qui mès explòten aguest producte: “gessem a compdar d’un pressupòst mès baish qu’es produccions americanes, mès a nivèu qualitatiu mos equiparam fòrça”. 

Entre es riders que participen en film, eth snowrider Alex Martínez destaque que sagen de mostrar “ua uelhada disparièra dera montanha a trauèrs des sues valors”. Per un aute costat trapam a Suso Folgar; aguest rider d’Arties coheisse qu’a complit un “rèpte personau” dempús de baishar eth “Forcanada, Tuc de Ras e era cara nòrd deth Vacivèr”, donques cada protagonista escuelh es sues pales. Entà acabar, Aymar Navarro remèrque qu’ei estada “ua experiéncia indesbrembable, tant peth nivèu d’esquí coma pes amistats bastides”. Aguest vesin de Les reconeish èster “emocionat peth trabalh e pera dedicacion de tota era equipa pendent tot er an” en tot demorar qu’eth flim “agrade ara gent”.

Iñaki Delaurens