Lo parlament francés a dich enfin de òc a l’autoconsume d’electricitat. Après l’Assemblada francesa, lo Senat a aprovat lo tèxt d’un projècte de lei establit per una comission mixta parlamentària, amb la tòca de favorir lo consume, per tot particular o tota entrepresa, de corrent qu’autoprodutz, mai que mai gràcias a de panèls solars, çò rapòrta La Tribune.
 
Per tant, lo projècte de lei legaliza l’autoconsume energetic de las collectivitats e obliga las companhiás que gerisson los rets de distribucion de facultar las operacions restacadas a la produccion pròpria d'energia. Se prevei egalament de tarifas adaptadas a las installacions d’autoconsume e de reduccions tarifàrias per l'usatge d'energias renovelablas.
 
S'agís d'una reüssida de las bèlas dins lo procès de transicion energetica dins l’estat francés, lo pus nuclearizat d’Euròpa puèi que lo 77% de son energia electrica proven de la fission atomica.
 
Mentretant, dins l’estat espanhòl, l’autoconsume d’electricitat es enebit per la lei que prevei de multas de 30 milions d’èuros s’òm capta l’energia del Solelh per far d’electricitat.