L'apèl de l'IEO Nacional, d'Òc-Bi e de Calandreta a manifestar per una lei lingüistica, a recebut dissabte 31 de març la responsa positiva de milierats de personas qu'an pres lo còr de Tolosa en una granda manifestacion reivindicativa. Fasiá tres ans de la darrièra granda marcha, a Carcassona en 2009, e la bona participacion faguèt evident que la clamor sociala en Occitània existís, qu'es pas una mòda. Los 80 carris venguts de tot lo país son un bon element objectiu per qualificar la participacion a la marcha Anem Òc!

 

Abans de la manifestacion, los organizadors convoquèron una conferéncia de premsa ont expausèron lo besonh de dotar d'una lei las lengas dichas regionalas o "autoctònas" al dire de Joan Francés Laffont, president de Convergéncia Occitana. Qualques elegits a nivèl regional e local mostrèron lo lor sosten a la peticion davant lo public, ont i aviá lo president del Senat francés Jean-Pierre Bel.

Pendent tot lo matin, lo centre de la reivindicacion foguèt la Plaça d’Euròpa, ont las entitats e las associacions occitanas quilhèron los taulièrs. Ailà, los manifestants poguèron manjar e beure un còp en tot escotar los discorses e la musica en dirècte; e de cançons interpretadas per qualques calandrons.


Puèi, la protèsta comencèt de bolegar pels baloards de Tolosa fins arribar a la Plaça del Capitòli, dins un ambient festiu e convivial, animat per de musicians e de fanfarras. Parier que los autres còps, los escolans de Calandreta foguèron nombroses dins la manifestacion.


Joan Francés Laffont a qualificat plan positivament la participacion, en tot indicar qu'ongan se son convocadas de manifestacions per las lengas dichas regionalas dins las principalas vilas de las regions amb lenga pròpria (Baiona, Perpinhan, Kemper, Aiacciu, Estrasborg, etc). E aquò a pas fach demesir la participacion a Tolosa, que s'es comptada en mai de 30 000 personas, 25 000 segon la polícia. A soslinhat tanben qu'es motiu de fiertat pel pòble occitan d'èsser estat a l'iniciativa d’aquel movement dempuèi 7 ans. Fin finala a declarat que França a pas ratificat l’article 30 de la Declaracion de Dreches de l’Enfant, a l'egal que Turquia, per exemple, e a volgut metre en evidéncia que se França èra pas dins l'Union Europèa i poiriá pas dintrar al jorn d'auèi sens ratificar aquel article.

A la fin de la manifestacion, dins la plaça del Capitòli i a agut la seguida de discorses dels organizators. An clavat la jornada los concèrts de Mans de Breish, Primaël, Joan Marc Leclercq, Lou Dàvi, Goulamàs'K, Lo Còr de la Plana, Zinga-zanga e Nadau.


L'album de fòtos de la manifestacion, per Cecília Hautefeuille