Lo Pentagòn anoncièt ièr que lo govèrn dels Estats Units liurariá d'armas e de sosten tecnic als curds de Rojava, per lor ajudar a conquistar la capitala de l’autoproclamat Estat Islamic, Raqqa. Amb aquela decision sens precedents,  los Estats Units s’afrontan dirèctament a Turquia, que considèra que las fòrças militaras dels curds de Siria, las YPG, fan partida del PKK; aqueste lucha per la creacion d’un estat curd en Curdistan tot, çò es que pertòque los estats turc, sirian, iraquian e iranian. De remembrar qu’en agost passat, Turquia intrèt dins l’estat sirian amb lo pretèxt de combatre l’EI, mas sa tòca èra d’arrestar la creissença del territòri contrarotlat pels curds.
 
En contrapartida de la conquista de Raqqa, que restariá a las mans dels arabis locals e non pas dels curds, las fòrças curdas demandan la consolidacion institucionala de la region de Rojava, valent a dire la partida de Curdistan que tòca l’estat sirian, e la dobertura d’un corredor economic que ligue son territòri autonòm amb la mar Mediterranèa. Aital evitarián los problèmas derivats del vèto de Turquia sus lors activitats comercialas. Aquel corredor seriá encara pus important davant la possibilitat que lo Curdistan iraquian convòque un referendum d’independéncia. A l’ora d’ara, lo tròç de Curdistan mai pròche de la mar se tròba a cent quilomètres de la còsta mediterranèa.
 
Fins ara, los Estats Units avián donat un supòrt indirècte a las fòrças curdas, que luchan contra l’EI. Se coneissiá la preséncia estatsunidenca e la liurason de qualques armas, mas aquò se fasiá per mejan de la Coalicion Aràbia Siriana, amb la quala los curds combaton los jihadistas. Mas ara, amb lo nòu òrdre signat pel president Trump, los Estats Units poiràn liurar d'armas e d’informacion d’intelligéncia dirèctament a las YPG. Lo quite Trump explicarà la portada d’aquel gèst al president turc Recep Tayyip Erdoğan, que se gandirà a Washington aquesta setmana. Per apaisar l’oposicion del govèrn turc, los Estats Units an ja dich que balharàn als combatents curds “solament las armas necessàrias per afrontar amb succès la batalha de Raqqa”.