Lo pichon Fañch, lo nenet breton que nasquèt l’11 de mai passat, poirà en fin finala portar oficialament son prenom. L’estat civil de Kemper (Bretanha), qu’aviá refusat als parents de donar aquel prenom a Fañch car lo signe “ñ” es pas reconegut per l’administracion francesa, a cambiat de decision, çò rapòrta Le Figaro.
 
“La vila de Kemper, capitala de la cultura bretona, a decidit de respondre favorablament a la demanda” dels parents del nenet, çò indica un comunicat de la vila que mençona l’article 75-1 de la Constitucion francesa, que “proclama que las lengas regionalas son reconegudas coma d’elements del patrimòni de França”.
 
Lo problema que lo pausava al començament l’estat civil per enregistrar lo prenom del pichon Fañch, es que l’estat francés a decidit quals son los sols signes diacritics autorizats. Los faguèt conéisser dins una circulara datada del 23 de julhet de 2014 que se publiquèt al Jornal Oficial. Los signes permeses son solament los de la lenga francesa, es a dire à, â, ä, é, è, ê, ë, ï, î, ô, ö, ù, û, ü, ÿ, ç. Per tant, dempuèi lo 23 de julhet de 2014 l’estat francés pòt pausar de problèmas se se vòl enregistrar de prenoms coma Jòrdi o Loís.