Lo president italian, Sergio Mattarella, a donat enfin son aprobacion al nòu acòrdi entre la Liga (coma se fa apelar ara la Liga Nòrd) e lo Movement Cinc Estelas per formar un govèrn en Itàlia. Aqueste còp, la lista dels ministres del candidat independent Giuseppe Conte a recebut l'aprobacion del president, çò rapòrta La Repubblica.
 
Conte li a presentat la lista dels ministres pachats entre los representants de la Liga e lo Movement Cinc Estelas, Luigi di Maio e Matteo Salvini. L’acòrdi permet de desblocar la formacion d'un govèrn e evita qu’ajan luòc de nòvas eleccions e que Carlo Cottarelli, èx-naut dirigent de l’FMI, forme un govèrn provisòri. Salvini pren lo ministèri de l’Interior e Di Maio lo del desvolopament economic.
 
Dimenge passat, Matterella dobriguèt una crisi constitucionala sens precedents en refusar lo ministre de l'economia que li prepausava Conte, Paolo Savona, perque èra tròp contrari a l’èuro e a l'Union Europèa. La decision provoquèt de criticas de la Liga e del Movement Cinc Estelas e lo renonciament de Conte.
 
Parallèlament, Mattarella ofriguèt a Cotarelli de far un govèrn provisòri per tal de convocar de nòvas eleccions en 2019. Mas lo president de la republica a finit qu’a acceptat los ministres que li a prepausats Conte.
 
 
 
Escàndol dins l’UE
 
Mentretant, lo comissari europèu encargat de la programacion financièra e dels budgets, Günther Oettinger, provoquèt un escàndol al còr de l'UE. Dins una entrevista al mèdia alemand DW, lo comissari assegurèt que los mercats mostrarián als italians de votar pas pus per de partits populistas: "Espèri que los mercats jogaràn un ròtle dins la campanha electorala e mandaràn un senhal per evitar que los populistas d'esquèrra e de drecha tengan de responsabilitats de govèrn", çò assolidèt.
 
Aquelas declaracions foguèron durament criticadas pel president de la Comission Europèa, Jean Claude Juncker, pel president del Conselh d’Euròpa, Donald Tusk, e quitament pel secretari d'estat per Euròpa del govèrn alemand, Michael Roth.