Macedònia del Nòrd. Vaquí lo nom causit per apelar oficialament l’Anciana Republica Iogoslava de Macedònia, e que permetrà de metre fin al conflicte diplomatic entre aquel país e Grècia. Pendent gaireben 30 ans, Grècia s’es opausada a l’intrada de Macedònia dins l’OTAN e a mes d’empaches a sas negociacions amb l’Union Europèa per una question onomastica: la denominacion Macedònia, que definís tanben la region grèga que sa capitala n’es Tessalonica, podiá pas èsser lo nom d’un estat independent. Totun, Luxemborg, per exemple, es a a l’encòp lo nom d’una província bèlga e d’un estat. Ara, amb aquel acòrdi istoric, se facilita lo camin de Macedònia per aderir a l’UE e a l’OTAN.
 
L’acòrdi ajonch pels govèrns d’Atenas e d’Skopje deu ara èsser ratificat pel parlament grèc e pels ciutadans de Macedònia. Macedònia crenhiá qu’un cambiament de nom poguèsse aver una repercussion negativa sus l’identitat nacionala de sos abitants, que la majoritat se dison “macedonians”. Pasmens, aquela solucion intermediària se sarra mai de las pretensions de las doas partidas. Es previst que l’acòrdi se signe la dimenjada venenta.