Aué, volia escríuer sus es montanhes, en tot presentar-vos ua iniciativa respècte deth sòn reconeishement en Estat espanhòu. Totun, ne parlarè un aute dia per’mor que, dempús de çò que vedem enes jornaus sus era politica espanhòla e catalana, ei pas possible non parlar deth poiriment que mos entore. Ei pas possible obviar es lauegi de casi de corrupcion que dia darrèr de dia secodissen eth país, en tot provocar qu’era gent age arribat ath punt d’en·hastiar era politica. En tot aguest lipo-lapo se i barregen es “pòques-vergonhes” e es aprofitats qu’an cometut delictes en tot profitar-se’n dera sua plaça priviletjada en aguest mon public o ena administracion. E atau, era  grèu practica de finançament illegau de partits qu’an crubat sistematicament sòs de quauques enterpreses tà fornir ua caisha B que s’utilizaue tà enriquir a mès d’un  politic ei en boca des mieis e des contribuents. S’a parlat aguesti dies deth cas Pallerols, ja jutjat e senteciat; ei un exemple de profitament de sòs o de hons destinadi ara formacion de trebalhadors que, fin finau,  passèren a finançar a UDC;  o deth cas Palau,  a on CDC se trape, ath delà de damb er embargament dera sua sedença, damb politics ath capdauant d’aguest partit que son imputadi pera justícia a compdar dera documentacion qu’estúdien es magistrats; o, eth cas estrelha, mès recent e qu’a resultat èster un autentic tèrratrem ena politica espanhòla, e a compdar deth quau  s’a metut ath descubèrt era practica generalizada deth Partit Popular d’utilizar, d’ençà un pialèr de temps, eth pagament de sòs illicits, per part d’empreses constructores, ath partit tà un posterior repartiment d’aguesti entre es sòns dirigents. E era notícia, per se non ère pro gròssa, que  met en entredit ath quite president deth govèrn! E çò qu’ei plan mès grèu, ara pròpria democracia espanhòla.
 
Ara, arribaràn totun, tempsi de catarsi. Arren poderà tornar a èster com ère. Possiblament, aquera serà era grana vertut d’aguesta malaïda crisi que tant de dolor genère. E serà ua catarsi exigida e supervisada pera ciutadania qu’erosament a dit pro. Era refondacion des valors politiques, desbrembades en tempsi de bonança economica, serà, sense cap de dobte, un des principaus èishi d’aguesta naua politica qu’a de començar per un cambi ena relacion entre es partis politics e era societat mès, tanben, per ua presa de consciéncia des ciutadans en çò que tòque as sòns engatjaments sus era gestion des ahèrs publics. Pr’amor que, possiblament, s’es ciutadans, non votèssen majoritàriament a partits reiteradamente saupicadi per casi de corrupcion, com en Valéncia o Balears, sense castigar enes urnes aguestes males praxis, jamès auéssem arribat ad aguest punt. Semble qu’era corrupcion sonque auie d’èster castigada quan es partits d’esquèrra se i vedien implicadi…  Era realitat ei qu’eth tumor a pres mesures gigantines e ara non n’i a pas pro damb un tractament terapeutic, que cau un tractament quirurgic.
 
Calerà conviccion e actituds valentes e aqueri seràn es unics instruments qu’auram toti es que, dempús des ans, auem servit aunèstament ara societat e auem estat coerents damb era nòsta militància. Ei eth moment de recuperar era democràcia, e eth prestigi e eth sens dera politica en tot reclamar es valors dera etica e dera estetica des servidors publics.