Manuel Valls anoncièt l’acte III de la decentralizacion. Lo movement occitan deu participar plenament a las discussions al subjècte de la reforma territoriala.
 
Per exemple, la comission Regions e Federalisme d’Euròpa Ecologia Los Verds indica que los enjòcs d’aquesta reforma non son pas las economias budgetàrias o la competitivitat de França, coma o declara explicitament Manuel Valls, mas las aspiracions dels abitants e l’imperatiu de democracia. Son aqueles principis que devon condusir lo retalhatge de las regions francesas . Produit tecnocratic de l’Estat jacobin de las annadas 1950, las regions actualas non correspondon gaire a las realitats istoricas, culturalas, economicas e socialas dels territòris de França. La coeréncia territoriala non demanda pas la reduccion del nombre de las regions, coma o mostra las regions de dimensions fòrça eterogènas de nòstres vesins italians, alemands o espanhòls. Atal, se pòt imaginar una region Val-de-Leire amb nòu departaments, coexistent amb de regions a dos departaments (Alsàcia, Savòia) o de collectivitats territorialas mai petitas tal coma Catalonha Nòrd e Pais Basc Nòrd. L’objectiu d’una desena de regions fixat arbitrariament per lo primièr ministre deu èsser abandonat.
 
Al contrari, la supression dels conselhs generals constituís un objectiu justificat amb la supression de competéncias multiplas (transpòrt, torisme...) e favorirà una melhora lisibilitat de las decisions e donc un enfortiment del contraròtle democratic de las institucions per la populacion.
 
E mai, lo transferiment de las competéncias departementalas a las regions non sufirà pas per ne faire de vertadièra democracia territoriala en carga del desvolopament economic local. De transferiments nòus de competéncias, amb los budgèts associats son necessaris en matèria culturala , agricòla, economica... E las indicacions del primièr ministre son clarament insufisentas.
 
Ça que la, la supression de la clausa de competéncia generala per totas las collectivitats publicas anariá radicalament a l’encontre del federalisme diferenciat defendut per los ecologistas. Al contrari, caldriá anar cap a la reconeissença del ròtle de las regions coma principala collectivitat territoriala que dispausarián d’un poder normatiu subre lor territòri. Lo manten de la clausa de competéncia generala per las regions es donc indispensable.
 
Amb aquelas reflexions, la comission Regions e Federalisme d’Euròpa Ecologia Los Verds prepausa una carta de la region de França que faga aparéisser las regions istoricas d’Alsàcia, Bretanha, Corsega e 4 regions occitanas Auvernhe-Limosin, Gasconha, Lengadòc, Provença. Las regions Pais basque nòrd, Catalonha nòrd , malgrat lor dimension petita son tanben essencialas e poirián èsser associadas a lor region vesina o a d’euroregions Euskadi o Catalunya. Per las collectivitats d’oltre mar, caldriá un estatut d’autonomia enfortit.
 
Definir de territòris regionals nòus exigís un grand debat dins las regions amb la participacion d’istorians, de geografs, d’economistas e de lingüistas amb de competéncias regionalas. Es en seguida que lo parlament deu debatre e propausar un retalhatge.



 
_____
* mai d’entresenhas dins www.regions-federalisme.eelv.fr
** véser tanben Quatre regions per Occitània