Avèm vist la setmana passada que certans grops de consonantas accèptan una pronóncia dobla: siá completa, siá simplificada.
 

Ara, vos presenti d’autres grops de consonantas que preferisson eles, gaireben tostemps, una pronóncia simplificada.

 

letras	occitan general (lengadocian)	provençal e niçard	vivaro- alpenc	auvernhat	lemosin	gascon	exemples
bd	[dd]	[d]	[d]	[d]	[d]	[dd]	sobde abdomèn
gd	[dd]	[d]	[d]	[d]	[d]	[dd]	regde Magdalena
bt	[tt]	[t]	[t]	[t]	[t]	[tt] (o [pt])	dobtar dissabte subtilitat
cm	[mm]	[m]	[m]	[m]	[m]	[mm]	Jacme
mn	[nn]	[ⁿn]	[ⁿn]	[ⁿn]	[ⁿn]	[nn] (o [mn])	gimnastica imne
tl	[ll]	[l]	[ll]	[ll]	[ⁿl]	[ll]	ametla rotlar Atlantic
tm	[mm]	[m]	[m]	[ⁿm]	[ⁿm]	[mm]	setmana atmosfèra
tn	[nn]	[n]	[n]	[ⁿn]	[ⁿn]	[nn]	retna etnologia
mps	[ns]	[ⁿs]	[ⁿs]	[ⁿs]	[ⁿs]	[ms]	tempsada
mpc (+ i)	[ns]	[ⁿs]	[ⁿs]	[ⁿʃ]	[ⁿs]	[ms]	redempcion
mpt	[nt]	[ⁿt]	[ⁿt]	[ⁿt]	[ⁿt]	[nt]	comptar temptar

 

 

Après aver vist aqueste tablèu, podèm arrestar la presentacion. Las remarcas que seguisson son d’importància mendre: se destinan mai que mai als legeires, professors o aprenents que cèrcan de detalhs.

 

Las pronóncias simplificadas, las del tablèu, son obligatòrias e sistematicas dins los mots de formacion populara coma sobde, regde, Magdalena, Jacme, ametla, rotlar, setmana, retna, tempsada, comptar.

 

Las pronóncias simplificadas son tanben recomandablas dins los cultismes (o mots de formacion sabenta) mas i son pas tan sistematicas. Per exemple:
 

— dins lo cultisme abdomèn, lo grop bd val [dd, d] (o eventualament [bd]);
 

— dins lo cultisme subtilitat, lo grop bt val [tt, t] (o eventualament [pt]);
 

— dins lo cultisme Atlantic, lo grop tl val [ll, l, ⁿl] (o eventualament [tl]);
 

— dins lo cultisme atmosfèra, lo grop tm val [mm, m, ⁿm] (o eventualament [tm]);
 

— dins lo cultisme etnologia, lo grop tn val [nn, n, ⁿn] (o eventualament [tn]).

 

Per simplificar l’ensenhament de l’occitan, val mai preferir las pronóncias simplificadas dins totes aquestes grops de consonantas que venèm de veire tals coma bd, bt, tl, tm, tn... 
 

Lo gascon, ça que la, coneis dos tipes de pronóncia per los grops bt e mn, quin que siá lo tipe de mot.
 

— Lo grop gascon bt val [tt] (o [pt]) dins dobtar, dissabte, subtilitat, etc.

— Lo grop gascon mn val [nn] (o [mn]) dins gimnastica, imne, hemna, etc.

 
A prepaus del grop mn, lo mot femna coneis una pronóncia especiala en provençal, [ˈfemɔ], que s’es tractada dins un article precedent (Jornalet, 6.2.2017).
 
A prepaus del grop bd, la forma sobde coneis l’equivalent subte, amb de preferéncias d’usatge que vàrian segon los dialèctes.
 
A prepaus del grop bt, lo mot dissabte coneis una variacion fòrça complèxa. Es pas lo tèma principal d’aqueste article mas ne podèm ramentar qualques aspèctes.
 

— Lo vivaroalpenc coneis dissabte [diˈsate] o dissande [diˈsaⁿde].

— Lo lemosin coneis dissabte [diˈsate] o dissabde [diˈsade]. Dins qualques autres dialèctes, lo tipe dissabde es tanben possible mas es pus rar.

— En niçard dison dissabta [diˈsata].