Lo problèma principal del cronicaire es de cronicar e de trapar un subjècte de desvolopar per reténer l’interès del legeire e/o de l’escotaire. E ben, pauròt-a-s, aquesta setmana, sabi pas tròp de qué vos vau parlar, sus qun subjècte vos vau faire don de ma pertinéncia, de mon impertinéncia e de ma sagacitat. Vejam un pauc:

• Jorns de caréncia: Financièrament, valdriá mai segon lo governament se trigoçar al trabalh puslèu que de recargar las batariás a l’ostal.

• Personal: L’aeropòrt de Carcassona a pas qu’un contrarotlaire. Quand es absent, los avions an pas qu’una solucion: s’anar pausar a Tolosa.

• Conflicte: Las rasons per qualas los coreans del nòrd pòdon èsser en conflicte amb los ucraïnians son plan foscas.

• Dinastia: La jove filha Ju-Ae del dictator nòrd-corean (11 ans) deuriá succedir (un jorn) a son paire. Atal, totas las dròllas del país qu’an lo meteis pichon nom ne devon cambiar e es interdit de se vestir e de se cofar coma l’eiretièra: “aquò seriá un fenomèn antisocialista a l’impacte negatiu sus la societat”!

• Escobilhas: Aqueles coreans del nòrd an arreglat lo problèma d’estocatge de las escobilhas. Las van escampar per via aeriana cò dels vesins!

• Sòmi: Lo sòmi fòl de Russia es de tornar fargar l’URSS.

• Presidenciala americana: Anam aver quatre ans per i tornar e ne véser las consequéncias. Visca la democracia!

• Lo grand uèit: Lo Mbappé es pregat de revisar las règlas del fòbal. Dins lo Classico, s’es fait pescar uèit còps fòra-jòc.

• Cranc blau: Lo cranc blau s’espandís en Mar nòstra, dins l’estanh d’Aur, en Corsega… Los còrses pensan cambiar las conservariás de peisses en conservariás de crancs blaus!

• Oltra-mar: França-2 a consacrat un Grand Échiquier a las riquesas culturalas dels territòris franceses d’oltra-mar. Se sap pas quora se farà una emission dedicada a las culturas non-francofònas de la metropòli (se jamai l’idèia lor i ven).

• Quista: La Rachida Dati vòl faire pagar las gens que dintran dins la Catedrala Nòstra-Dama a París. Cossí destriar un torista d’un fidèle? Notatz, ça-que-la que i a ja moneda de daissar quand vas dins un estadi-temple del rugbi.

• Infernal: L’arquevèsque de Tolosa a fait dire una messa per se parar de las maquinassas qu’an trevat las carrièras de la ciutat mondina sul tèma Las pòrtas de las tenèbras.. Èra per lutar contra aquela vesion infernala! Mas sa religion jòga pas ja sus la paur d’aquel Infèrn? Lo prelat auriá plan aimat menar lo Minotaure al Mata-buòu?

Croniquet Roch